ಚಿತ್ರದುರ್ಗ : ನಗರದ ಮುಖ್ಯ ರಸ್ತೆ ಹಾಗೂ ಹೆಚ್ಚು ವಾಹನಗಳ ದಟ್ಟಣೆ ಇರುವ ಕಡೆ ಗುಣ ಮಟ್ಟದ ಹಂಪ್ಸ್ಗಳನ್ನು ಅಳವಡಿಸುವಂತೆ ಕರುನಾಡ ವಿಜಯಸೇನೆ ವತಿಯಿಂದ ನಗರಸಭೆ ಮುಂಭಾಗ ಮಂಗಳವಾರ ಪ್ರತಿಭಟನೆ ನಡೆಸಿ ಪೌರಾಯುಕ್ತರಿಗೆ ಮನವಿ ಸಲ್ಲಿಸಲಾಯಿತು.
ನಾಲ್ಕೈದು ತಿಂಗಳುಗಳ ಹಿಂದೆ ರಸ್ತೆಗೆ ಹಾಕಲಾಗಿದ್ದ ಹಂಪ್ಸ್ಗಳು ಕಳಪೆಯಾಗಿದ್ದ ಪರಿಣಾಮ ಕಿತ್ತು ಹೋಗಿವೆ. ಬಿಲ್ ಪಾವತಿ ಮಾಡದೆ ಗುತ್ತಿಗೆದಾರರನ್ನು ಕಪ್ಪು ಪಟ್ಟಿಗೆ ಸೇರಿಸುವಂತೆ ಆ.15 ರಂದು ಒತ್ತಾಯಿಸಿದ್ದೆವು. ಆದರೂ ಯಾವುದೇ ಕ್ರಮ ಕೈಗೊಂಡಿಲ್ಲ. ಅಲ್ಲಲ್ಲಿ ಅಪಘಾತಗಳಾಗುತ್ತಿವೆ. ಕೆಲವು ಕಡೆ ಹಂಪ್ಸ್ಗಳು ವಾಹನ ಸವಾರರಿಗೆ ಸರಿಯಾಗಿ ಕಾಣಿಸುವುದಿಲ್ಲ. ಅಂತಹ ಕಡೆ ದ್ವಿಚಕ್ರ ವಾಹನ ಸವಾರರು ಸಾಕಷ್ಟು ಬಾರಿ ಬಿದ್ದು ಕೈಕಾಲುಗಳಿಗೆ ಗಾಯ ಮಾಡಿಕೊಂಡಿರುತ್ತಾರೆ. ಜೆಸಿಆರ್. ತುರುವನೂರು ರಸ್ತೆ, ಹೊಳಲ್ಕೆರೆ ರಸ್ತೆ, ಬಿ.ಡಿ.ರಸ್ತೆ, ದಾವಣಗೆರೆ ರಸ್ತೆ, ಪಂಚಾಚಾರ್ಯ ಕಲ್ಯಾಣ ಮಂಟಪದ ಎದುರುಗಡೆ ಹಾಗೂ ಇನ್ನಿತರೆ ರಸ್ತೆಗಳಲ್ಲಿ ಒಂದು ವಾರದೊಳಗಾಗಿ ಹಂಪ್ಸ್ಗಳನ್ನು ಹಾಕಬೇಕು. ನಗರದ ಬಹುತೇಕ ಕಡೆ ಯು.ಜಿ.ಡಿ. ತುಂಬಿ ಹರಿಯುತ್ತಿರುತ್ತದೆ. ಹಳೆ ಕಾಲದ ಯುಜಿಡಿ. ಬದಲಾವಣೆಯಾಗಬೇಕೆಂದು ಕರುನಾಡ ವಿಜಯಸೇನೆ ಜಿಲ್ಲಾಧ್ಯಕ್ಷ ಕೆ.ಟಿ.ಶಿವಕುಮಾರ್ ಒತ್ತಾಯಿಸಿದರು.
ಕರುನಾಡ ವಿಜಯಸೇನೆ ಮಹಿಳಾ ಘಟಕದ ಅಧ್ಯಕ್ಷೆ ವೀಣಗೌರಣ್ಣ, ಕಾರ್ಯದರ್ಶಿ ಸಿ.ಜಗದೀಶ್, ಉಪಾಧ್ಯಕ್ಷ ಮುಜಾಹಿದ್ದೀನ್, ನಗರಾಧ್ಯಕ್ಷ ಅವಿನಾಶ್, ವರುಣ್, ಪ್ರದೀಪ್ ಆರ್. ಇನ್ನು ಅನೇಕರು ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.
